Ватан

(Ўзбекистон Республикаси мустақиллигининг 30 йиллигига бағишланади)

 

Не-не боболарим кўз қароғида,

Шу Ватан барчанинг дил ардоғида,

Не-не Тошбуларнинг қўл қадоғида,  –

Ҳурлик-чун асралган туморим  Ватан,

Фахримсан, ғурурим ҳам орим Ватан!

 

Қодирий ва Усмон айтган сўнги сўз,

Камолингни кўзлаб ва юмдилар кўз,

Кетдилар оламдан кўрмайин кафан, -

Қатағон қонида чўмилган Ватан,

Дилига алами кўмилган Ватан!

 

Пахтазорда боланг тўнглаб қолганда,

Афғон йўлларида кўзинг толганда,

Тақдир ёзуғидан бир дам олиб тин, -

Бўтадайин бўзлаб қолганим Ватан,

Уларни Худога солганим Ватан!

 

Тарихинг оловга отганда ёвлар,

Бошингда турганди тили “соқов”лар,

Донишмандинг бошига тушди “қиров”лар, -

Отадай кўзларинг ёшланди Ватан,

Покиза юрагинг ғашланди Ватан!

 

Гоҳида зор бўлдинг бир бурда нонга,

Шунда ҳам суяндинг шукур, иймонга,

Бурмадинг ҳаттоки, нафсни ҳаромга, -

Қалбимдаги зиё, иймоним Ватан,

Дилимдаги аҳду паймоним Ватан!

 

Эрк учун тўкилган қонларнинг ҳаққи,

Ўзимга сиғмайин кетаман гоҳи,

Кўзимга сурай у жонларнинг ҳокин, -

Уларнинг хотирин ёд этдим Ватан,

Дилимни шу билан шод этдим Ватан!

 

Оллоҳ назар солган жаннатмаконим,

Сен билан биргадир ҳар лаҳза, оним,

Мадҳинг дилимдаги имон каломим, -

Онамдай муқаддас, улуғим Ватан,

Кўзим қароғидек қутлуғим Ватан!

 

            Зарифа Ибрагимова

Ўзбекистон Журналистлари ижодий уюшмаси

Жиззах вилоят бўлими қошидаги

“Ёш журналистлар” мактаби тингловчиси